طالبان نے افغان فوج اور پولیس کے 100 اہلکاروں کو ہلاک کر دیا

مہر خبررساں ایجنسی نے ایکس پریس  کے حوالے سے نقل کیا ہے کہ افغانستان میں طالبان  دہشت گردوں نے فوج اور پولیس کے 100 اہلکاروں کو ہلاک کرنے کا دعوی کیا ہے۔ ذرائع ابلاغ کے مطابق صوبہ ہلمند کے دارالحکومت لشکرگاہ کے نواح میں لڑائی کے دوران پسپا ہوتے ہوئے افغان سیکیورٹی اہلکار طالبان کے گھیرے میں آ گئے جن میں سے 100 اہلکاروں کو طالبان دہشت گردوں نے قتل کردیا۔ رپورٹ کے مطابق اہلکاروں کو لشکرگاہ کے نواحی علاقے چاہ انجیر میں قتل کیا گیا۔ ایک اہلکار فیض محمد کے مطابق میرے علاوہ صرف 2 اور اہلکار وہاں سے بچ کر آئے ہیں۔ طالبان نے اہلکاروں کی 22 گاڑیوں، درجنوں ٹرکوں اور سیکڑوں رائفلوں پر بھی قبضہ کرلیا۔ طالبان ترجمان قاری یوسف احمدی نے کہا کہ دہشت گردوں نے درجنوں اہلکاروں کو اغوا بھی کرلیا۔ افغان فوج کے ترجمان کے مطابق مزید 400 اہلکاروں کو لشکر گاہ بھیج دیا گیا ہے۔ ادھر مشرقی صوبہ ننگرہار میں ڈرون حملوں میں داعش کے 27  دہشت گرد ہلاک ہوگئے ہیں۔